حلقہ بندیوں کے معاملے پر ایم کیو ایم کا 9 جنوری کو احتجاجی ریلی نکالنے کا اعلان

  کراچی: قومی موومنٹ (ایم کیو ایم) پاکستان نے بلدیاتی انتخابات کے حوالے سے ووٹر لسٹوں کو مسترد کرتے ہوئے متنازع حلقہ بندیوں کے خلاف 9 جنوری ...

 

کراچی: قومی موومنٹ (ایم کیو ایم) پاکستان نے بلدیاتی انتخابات کے حوالے سے ووٹر لسٹوں کو مسترد کرتے ہوئے متنازع حلقہ بندیوں کے خلاف 9 جنوری کو احتجاجی ریلی نکالنے کا اعلان کردیا، جس میں شرکت کیلیے پی ایس پی ، فاروق ستار سمیت دیگر مہاجر رہنماؤں کو دعوت دی جائے گی۔

ایکسپریس نیوز کے مطابق ایم کیو ایم پاکستان نے بلدیاتی انتخابات کے حوالے سے آئندہ کی حکمت عملی مرتب کرلی، جس کے تحت 9 جنوری کو احتجاجی ریلی نکالی جائے گی جس میں شرکت کیلیے پاک سرزمین پارٹی، فاروق ستار، مہاجر قومی موومنٹ حقیقی، جماعت اسلامی کو دعوت دی جائے گی۔

ایم کیو ایم کے جنرل ورکرز اجلاس سے قبل رابطہ کمیٹی کی اہم بیٹھک ہوئی جس میں حلقہ بندیوں اور ووٹر لسٹوں کے حوالے سے مختلف سیاسی جماعتوں کے ساتھ رابطے بڑھانے اور مل کر جدوجہد کرنے پر اتفاق کیا گیا۔ ذرائع کے مطابق ایم کیو ایم پاکستان کے قائدین پاک سرزمین پارٹی کے مرکز پاکستان ہاؤس جبکہ پی آئی بی میں ڈاکٹر فاروق ستار کی رہائش گاہ جائیں گے اور انہیں 9 جنوری کو ریلی میں شرکت کی دعوت دیں گے۔

ذرائع کے مطابق ایم کیو ایم نے حلقہ بندیوں اور ووٹر لسٹوں کو مسترد کردیا جبکہ بلدیاتی انتخابات کے حوالے سے سڑکوں پر آنے کا فیصلہ کیا ہے۔ رابطہ کمیٹی کے اجلاس میں حکومت سے علیحدگی کے حوالے سے فی الحال کوئی فیصلہ نہٰں کیا گیا۔

ذرائع کا یہ بھی کہنا ہے کہ پی ایس پی قائدین سے رابطہ کمیٹی کے رکن اور سابق ایم پی اے رؤف صدیقی نے ٹیلی فونک رابطہ کیا اور انہیں رات 9 بجے پاکستان ہاؤس کے دورے سے متعلق آگاہ کیا۔