وزیر مملکت برائے داخلہ طلال چوہدری کاکہنا ہے کہ پی ٹی آئی سوشل میڈیا اکاؤنٹس سے اشتعال کا معاملہ نہ سیاسی ہے اور نہ ہی اظہار رائے کی آزادی...
وزیر مملکت برائے داخلہ طلال چوہدری کاکہنا ہے کہ پی ٹی آئی سوشل میڈیا اکاؤنٹس سے اشتعال کا معاملہ نہ سیاسی ہے اور نہ ہی اظہار رائے کی آزادی بلکہ یہ برطانیہ اور عالمی قوانین کی کھلی خلاف ورزی ہے۔
طلال چوہدری نے کہا کہ ہر ریاست کی ذمہ داری ہے کہ اس کی سرزمین پر موجود لوگ کوئی ایسا عمل نہ کریں جس سے کسی دوسری خودمختار ریاست کے افراد کو بغاوت اور تشدد پر اکسایا جائے۔
پی ٹی آئی اکاؤنٹس سے آرمی چیف کے قتل کے مطالبے کی ویڈیوز زیر گردش ہیں، پاکستان نے برطانیہ کو خط لکھ دیا
وزیر مملکت نے امید ظاہر کی کہ برطانیہ اس معاملے پر کارروائی کرے گا، انہوں نے ساتھ ہی واضح کردیا کہ پاکستان کے پاس دیگر آپشنز بھی موجود ہیں۔
ادھر وزیر مملکت برائے داخلہ طلال چوہدری نے پی ٹی آئی کے سیاسی احتجاج کے نام پر افواج کے سربراہ کو قتل کی دھمکیاں دینے کو ناقابلِ قبول قرار دیا۔
وزیر مملکت برائے داخلہ طلال چوہدری نے کہا کہ پی ٹی آئی سیاست کے نام پر تشدد اور دھمکیوں کا سہارا لے رہی ہے ۔
یاد رہے کہ حکومت پاکستان کی جانب سے برطانوی حکومت کو خط لکھ کر مطالبہ کیا گیا ہے کہ پی ٹی آئی کے سوشل میڈیا اکاؤنٹس پر ایسی ویڈیوز زیر گردش ہیں جن میں آرمی چیف کو قتل کرنے کی دھمکیاں دی جا رہی ہیں، برطانیہ ایسے تمام اکاؤنٹس کے خلاف کارروائی کرے جو پاکستان میں دہشت گردی، تشدد اور عدم استحکام پیدا کرنے کی کوشش کر رہے ہیں۔
خط میں کہا گیا ہے کہ پی ٹی آئی سے منسلک پلیٹ فارمز سے مسلسل انتشار، تشدد کی کالز دی جا رہی ہیں، خط میں مطالبہ کیا گیا ہے کہ برطانیہ، قتل اور تشدد کی کالز دینے والوں کو شناخت اور تحقیقات کرکے ان کے خلاف مقدمہ چلائے۔
کوئی تبصرے نہیں